San Migel eliza (Iurreta)

Iurretako San Migel eliza XIX. mendearen hasieran eraiki zuten, lehendik zegoen kanpandorre rokokoaren ondoan. Eliza neoklasikoa da eta lauki baten gainean jarritako gurutze grekoaren forma du, lauki hori errektangulu handiago baten barruan dago. Burualdean exedra bat du; oinetan berriz, koru altua. Elizaren barrualdean San Migel Arkanjeluren irudia duen erretaula modernoa da nagusi.

Elizpea hegoaldean dago, erdi puntuko arkuek osatzen dute eta erdikoa plazara begira dago gainean frontoitxo bat duela.

Dorrea, 1788koa, harearri landuzkoa da, moldurek banatutako hiru zatik osatzen dute eta goian linterna eta kupula txikia ditu, haize-orratza buru duela.