Plentziako alde zaharra

Plentziako alde zaharreko kale estuek gune historikoen benetako xarma dute oraindik. Mota askotako eraikinak ikusi daitezke bertan, oraindik marinel kutsua dutenak, jauregitxoak eta eliza, adibidez. Udaletxe zaharra da horietako bat (gaur egun museoa da). Harlanduzko etxe bikain hau alde zaharreko ikusgarrienetarikoa da. Muxika-Butroe leinuaren dorreak ere merezi du bisita bat, eta aitzina herria inguratzen zuen harresiaren arrastoren bat ere badago alde zaharrean, Santiagoko arkua, hain zuzen. Andre Maria Madalenako eliza alde zaharraren goiko aldean dago. Dorreak itxura sendoa du, kanpandorrea izateaz gain, herria zaintzeko ere balio zuen eta. Bizkaiko estilo gotiko bereziaren barruan sartu daiteke.