Andra Mari Eliza

Galdakaoko erlijio eraikinik zaharrena da Andra Mari eliza. Elexalde auzoan eraiki zuten XIII. mendean, Gangureneko Santa Marina antzinako eliza ordezkatzeko. Erdi Aroko eraikin mota da. Gerora, handitu egin zuten eta 1516an berreraikia izan zen. Estilo erromanikoa eta gotikokoa nahasten ditu eta berreraikuntzan jarri ziren elementuek berpizkundeko estiloa dute. Elementurik nabarmenena ataria da, erromaniko berantiar estilokoa da, gotikoaren ezaugarri batzuk dituena. Antzinako eraikuntzaren hondarrak kanpandorrean geratzen dira, XII. mendekoak dira. Erretaula platereskoa du eta bertan XIII. mendeko Andre Mariaren taila bat dago.