Gorbeialdeko zaldien erakusketa

Ekaineko azken igandean egin ohi dute Gorbeialdeko zaldien erakusketa Ondategin (Zigoitia); ezbairik gabe, eskualdeko ekitaldirik ospetsuenetako bat dugu hori.

Zaldi, behi, ardi eta ahuntz aziendaren erakusketa izango da ikusgai goiz osoan zehar. Horrez gainera, beste hainbat jarduera prestatu dituzte aurtengoan ere: oztopo-jauzi txapelketa, horseball (saskibaloia, zaldi gainean) erakustaldiak eta zalgurdi-probak, besteak beste.

Urtero legez, gaur egungo aizkolaririk onenek euren abilezia erakutsiko dute aizkolari-txapelketan. Hori gutxi balitz, artisauek euren eskulanak salgai jarriko dituzte eta familia osoarentzako jarduerak (puzgarriak, esaterako) egongo dira. Dantzariek eta fanfarreek jaia girotuko dute.