Ardixarra Etxea. Erdi Aroko Interpretazio Zentroa

Gure arteko etxe zaharrenetariko bat izateaz gainera, Segurako eraikin adierazgarriena da Ardixarra Etxea. Etxe-tailerra izan zen, eta, antza, merkatari batek eraiki zuen XVI. mendearen bukaeran. Erdi Aroa bukatu eta gutxira hiritar gehienak mota honetako etxebizitzetan bizi ziren.

Egurrezko egitura gorde duen azken etxeetako bat da. Erainikinak hiru solairu ditu. Behe-solairuan Turismo Bulegoa eta Segurako historia eta kultura jorratzen dituen ikus-entzunezko muntaia aurkituko dituzte bisitariek.

Lehenengo solairuan garaiko eraikuntzak egiteko erabiltzen zituzten materialak eta aldi baterako erakusketak ikusgai daude. Bestalde, bigarren solairuan Euskadin bakarra den Erdi Aroko Interpretazio Zentroa dago. Gune horrek gure kulturaren nondik norakoak era erraz eta entretenigarrian ulertzen lagunduko digu.

"Historia" atalak, esaterako, hiribilduen fundazio prozesua (Gipuzkoako hiribilduena bereziki) azaltzeaz gainera, mapak, dokumentuak eta Donejakue Bidearen inguruko informazioa biltzen ditu.

"Hirigintza" sailak XV. eta XVI. mendeetan Segurako hiri-morfologiaren, harresien edo orubeen lur-zatiketaren berri emango digu. Bukatzeko, talde sozialak, bandoen arteko hika-mikak, gremioak, kofradiak eta espazio publiko eta pribatuen arteko borrokak izango dira aztergai azken atalean.