Foronda jauregia

Foronda jauregi ikusgarria Forondako markesak uda bertan igarotzeko eraiki zuten. Egun, ordea, Zumaiako kultur etxea da. Juan Jose Gurrutxagak diseinatu zuen. Gurrutxaga Eibarko udal arkitektoa zen arren, Donostian egin zituen lan gehienak, justizia jauregia, esaterako. Itxura dotorea ematen diote hareharrizko harlanduz egindako hormek eta almenek. Erabilera publikorako areto ugari, argazki laborategia eta Internet zerbitzua daude Zumaiako kultur etxean. Horrez gain, bertan daude udal liburutegia eta 1292tik 1960ra arteko dokumentuak biltzen dituen udal agiritegia ere.