Arabako Errioxa. Historia eta abentura

300 upeltegi baino gehiago izanik, Arabako Errioxaren ezaugarri nagusia ardoaren kultura da. Dena den, eskualde honek beste zenbait aukera ere eskaintzen ditu bere lurrez gozatzeko. Ondare natural aberatsa, besteak beste, Toloño mendilerroa, Ebro ibaia edota Guardiako aintzirak barne hartzen dituena, eta bere ondare historikoa, artistikoa eta arkeologikoa eskaintzen ditu Arabako Errioxak. Guri hobekien egokitzen zaizkigun aukerak antolatzea eta uztartzea besterik ez dugu behar. Honako plan honetan, Arabako Errioxaren alderdi historiko eta abenturazaleena ezagutzea proposatzen dizuegu.  

GOIZEAN

Goizeko planak eskualde honen historia zaharrena ezagutzera eramango gaitu. Arabako Errioxak historiaurreko aztarna ugari dauzka. Toloñoko mendilerro ederraren magalean dauden zortzi trikuharriek ibilbide bat osatzen dute, ibilgailuan egiteko bide bikaina dena. Euskadi osoko handienetakoak eta ikusgarrienetakoak dira. Horrez gain, ondo zainduta daude eta sarbide erraza dute, eta ezkutuan gordetzen duten magia bisitariari erakusteko prest daude. Udalerri desberdinetan dauden trikuharriek osatzen dute ondare aberats hau: Los Llanos dolmena Kripan; Sorginaren Txabola eta El Encinal trikuharriak Elvillarren; El Alto de La Huesera, San Martin, El Sotillo eta Layaza Guardian; eta Montecillo trikuharria Eskuernaga udalerrian.

Autoarekin ibilaldia burutzeko 3 ordu inguru behar dira.

Bisita arkeologikoaren ondoren, bazkaltzeko ordua da. Ibilbideko edozein udalerritan geratzea aukera bikaina izango da.

ARRATSALDEAN

Arratsaldean, Ebro ibaira gerturatzea proposatzen dizuegu, Lapuebla de Labarca udalerritik abiatuta; zehazki, La Poveda izeneko aisialdi-gunetik. Han ontziratzeko leku berri bat dago, eta bertatik irteera gidatu bat egin daiteke ibaian kayakean. Hori bai, horretarako zerbitzu hori eskaintzen duten enpresa espezializatuekin harremanetan jarri eta erreserba egin beharko dugu aldez aurretik.

Emari handiena duen Espainiako ibaiaren zati batean barrena ibiltzea aukera berdingabea da, izan ere, ibilbide seguru eta lasai batez gozatzeko aukera emango baitigu.

KONTRATA DAITEZKEEN ZERBITZU-ENPRESAK:

• Kayak-irteerak: LOS CAZAVENTURAS / Bastida / 945 331 496 / 676 925 746 / www.cazaventuras.com
• Kayak-irteerak: LAPUEBLA KAYAKS / Lapuebla de Labarca / 646 588 525 / www.lapueblakayaks

Non jan plan honetan: www.euskadigastronomika.eus

Non ostatu hartu plan honetan: www.nekatur.net