Itsasmuseum Bilbao museoa

Euskalduna ontziola zenaren kai-muturretan kokatuta, itsas-jarduerak Bilboko Itsasadarraren inguruan sortutako ondarea eta, oro har, itsasoko kulturarekin zerikusia duten elementuak ezagutaraztea du xede Itsasmuseum Bilbao museoak.

Kanpoko aldeak 20.000 metro koadro ditu, eta Euskalduna ontziolako dike zaharrak daude bertan. Han, itsasontziak, Ponpa Etxola eta Karola garabi bitxia ikus ditzakegu.

Barruan, berriz, hiru gai nagusiren inguruan egituratu dute erakusketa: "Itsasadarra: itsas-portua", "Itsasadarra: merkatua eta faktoria" eta "Itsasadarra: ontziola". Besteak beste, zaharberritutako itsasontzi mota ezberdinak eta simulagailuak bezalako punta-puntako elementu teknologikoak daude.

Elementu horiek guztiek Bilboko itsasoko kultura hobeto ezagutzeko balio dute.