Algorri Interpretazio Zentroa

Algorri interpretazio zentroari esker Zumaiako itsaslabarrak eta marearteko zabalgunea ulertuko ditugu, natura-gune harrigarria. Zumaiako labar ikusgarriek munduko santutegi geologiko garrantzitsuenetarikoa eta ezagunenetarikoa osatzen dute.

Geologia-altxor horretaz gainera, Bizkaiko golkoko zenbait eraketa eta ekosistema aipagarri biltzen ditu Zumaiak. Esate baterako, Deba eta Zumaia arteko marearteko zabalgune ikusgarria -biotopo babestu izendatua-, Santiagoko dunak, San Migeldo artadia eta Beduako uharte- eta padura-multzoa. Algorrik natura-gune horri buruzko erakusketa eskaintzen du, ikus-entzunezkoekin, tailer didaktikoekin, laborategi, liburutegi eta irteera gidatuekin batera. Irteerak larunbatetan egiten dira, oinez eta ontziz.