Getariako txakolina. Upategia bisitatzea eta dastatzea Zarautzen

Zarauzko Talaimendi mendiaren hegal eguzkitsuenean dago Talai Berri familia upategia. Txakolindegia familiarenak diren 12 hektareako mahastiz inguraturiko muino baten goialdean dago kokatuta. Berrikuntzari esker, belaunaldiz belaunaldi beren nortasunari eutsi ahal izan diote, aldi berean arbasoen lanketa prozesuak hobetuta. Hala, aitzindariak izan dira ardoa egiteko sistema aurreratuenak ezartzen. Herentziaren eta modernotasunaren arteko uztartze hori primeran islatzen da egiten dituzten produktuetan. Upategiaren bisita gidatua egin eta txakolinaren elaborazio prozesuko urrats guztiak ezagutu ostean, inguruko produktu tipikoenak dastatzeko aukera izango duzu (Ibarrako piperrak, hegaluzea, Nafarroako txorizoa eta Idiazabal gazta), upategiko txakolinaz lagunduta.