Andra Mari eliza

Andra Mari eliza XVI. mendearen bigarren erdian hasi ziren eraikitzen. Errenazentista da eta nabe bakarra du. Bost zatitan dago banatuta nabe hori, bigarren zatian bi kapera ireki daude, eta horrela gurutze itxura ematen diote elizari. Nabearen burua oktogonala da eta hanka parean korua dago. Kanpoaldetik harlandu bikainaz eginda dago eliza eta dorrea handitasunez nagusitzen da, kanpandorre handia duela. Elizak hiru sarrera ditu, nagusia bi pisuko garaipen arkua da eta atari-erretaula zoragarria du. Barruan, nabarmentzekoa da erretaula nagusia, rokoko estilokoa.