Antiguako Amaren baseliza

Baseliza honi buruzko lehen aipamenak 1503koak dira. Garai bateko errege-bidean dagoenez, antzina oinezko asko bertan geratzen ziren otoitz egiteko. Baselizaren aurrean Kalbarixoko gurutzea zegoen (gaur errepidearen beste aldean dago) eta amek bertara eramaten zituzten haurrak oinez ikastera. Gurutzeari hiru buelta ematen zizkioten, eta, buelta bakoitzean, beheko partean irudikatuta dagoen oilarrari musu ematen zioten. Ondoren, amak, haurrak besapean zituztela, baselizan sartzen ziren otoitz egitera eta kandela bat edota limosnatxo bat eskaintzen zuten. Baselizaren barruan, XVI. mendeko Andre Mariaren irudi gotiko bikaina ikus daiteke. Garai batean XV. mendeko Andre Maria Magdalenaren irudia ere bazegoen, baina Donostiara eraman zuten.