Bibat museoa

Bibatek Arabako Arkeologia Museoa eta Fournier Karta Museoa bateratzen ditu. Gasteizko Alde Zaharrean kokatuta dago eta bi eraikin elkartuek osatzen dute: lau solairuko eta bi sotoko eraikin berria, zeinetan arkeologiari eskainitako erakusketa iraunkorrean 1.500 pieza erakusten diren; eta zaharberritutako Bendaña jauregia, zeinetan 250 karta-sorta daude erakusgai.

Horrez gain, eraikin berriaren beheko solairuetan daude gordailu guneak, ikertzaileentzako aretoa, didaktika gela eta liburutegia. Patioko pasabidetik bisitarientzako harrera-lekura iristen da, eta haren ondoan daude ekitaldi-aretoa, atsedengunea eta aldi baterako erakusketen aretoa.

Arkeologiaren inguruko guneari dagokionez, Arabaren historiaren laburpena egiten du museoak, Paleolito Arotik Erdi Aroko hiribilduen sorrerara arte, ikusgai dauden objektuetan oinarrituta. Horrekin batera, arkeologia-metodoaren azalpena ere ematen du.

Bestalde, Bendaña jauregian Félix Alfaro Fournierren karta-bilduma dago; askorentzat, munduko bildumarik garrantzitsuena. Gaika antolatutako karta sortez gain, museoak erakusgai ditu karten ekoizpen prozesuak eta joko mota ezberdinak.